आइतबार राति अज्ञात समुहद्वारा पोखराको लेकसाईडमा भारतीय पर्यटक बसमा आगजनी -

November 30, 2015

 डिसीनेपाल डटकमबाट 

 पोखराको लेकसाइडमा आइतबार राति अज्ञात समुहले भारतीय पर्यटक बसमा आगजनी गरेका छन् । आईतबार मध्यरातमा तीनजनाको समुहमा आएका व्यक्तिले पेट्रोल छर्केर आगजनी गरेपछि बस जलेर क्षतिग्रस्त भएको हो । भारतको गुजरातबाट काठमाडौं हुँदै आइतबार राति १०ः३० बजेतिर पोखरा आएको बसलाई पार्किङ गरी राखेकै ठाउँमा बिहान १ बजेतिर आगजनी गरिएको प्रहरीले जनाएको छ । 

 ‘सबै पर्यटक होटलमा झारेर पार्किङमा राखिएको बसमा बसका सहचालक सुतिरहेका बेला तीनजना ढोका खोलेर भित्रपसेपछि प्लाष्टिकको बोतलमा ल्याएको इन्धन छर्केर आगजनी गरेको कास्कीका प्रहरी उपरीक्षक हरिबहादुर पालले बताएका छन् । उनले घटनाबारे थप अनुसन्धान भइरहेको बताए । 

यूपी ५१ पी ८३११ नम्बरको बस आगजनी गरिएपछि बसका खलासी बिहारका १६ वर्षीय यतिन यादव घाइते भएका छन् । हात, खुट्टा जलेर घाइते भएका यादवको गण्डकी मेडिकल कलेज पोखरामा उपचार भइरहेको प्रहरीले जनाएको छ ।बस जलेर पूर्ण क्षतिग्रस्त भएको छ ।

 सिट, सिसाहरु जलेर खरानी भएका छन । ४९ यात्रु बोकेर पोखरा आएको बस जलाईएपछि घटनाको जिम्मेबारी कसैले लिएका छैनन् । बसमा लगाइएको आगो स्थानीयबासी, प्रहरी र दमकलको सहयोगमा नियन्त्रणमा लिइएको थियो ।

Labels: News