भक्तपुरमा एमाओवादीको सिंगो कमिटी नै एमालेमा प्रवेश

कात्तिक : एकीकृत नेकपा माओवादी गुन्डु कमिटी नेकपा(एमाले)मा आज समाहित भएको छ । एमाले गाउँ कमिटी गुण्डुले आयोजना गरेको कार्यक्रममा एमाओवादी गुन्डु कमिटीका अध्यक्ष पुष्पकुमार कार्कीको नेतृत्वमा कमिटीका पदाधिकारीसहित २८ जनाले एमाओवादीको गाउँ कमिटी कार्यालय, पार्टीको लेटर प्याड तथा छाप र सम्पूर्ण कागजपत्र बुझाएर पार्टी प्रवेश गरेको घोषणा गरेका हुन् ।

 कार्यक्रममा पूर्वउद्योगमन्त्री महेश बस्नेतले एमाओवादीबाट एमालेमा आउनेलाई टीका लगाएर खादा ओढाउनुभएको थियो भने अनन्तलिङ्गेश्वर एमाले नगर कमिटीका अध्यक्ष भाइकृष्ण श्रेष्ठले माला लगाइदिएर स्वागत गर्नुभएको थियो । सो अवसरमा नेता बस्नेतले एमाले र एमाओवादीबीच पार्टी एकीकरणको सुरुआत भएको जिकिर गर्दै यसले देशव्यापी सन्देश दिने बताउनुभयो ।

 बस्नेतले भन्नुभयो– “देशभरका कम्युनिस्ट एक हुनुपर्छ, एमाले र एमाओवादीको पार्टी एकीकरण गुन्डुबाट सुरुआत भएको छ ।” नाकाबन्दी खुलाउन सरकारले पहिलो प्राथमिकता दिनुपर्ने बताउँदै उहाँले चीनसँगको नाका खुलाउन पनि सरकार अग्रसर हुनुपर्नेमा जोड दिनुभयो । एमाओवादीबाट एमालेमा प्रवेश गरी पार्टी एकीकरणको घोषणा गर्दै कार्कीले एमालेसँग एमाओवादी एकीकरणको सुरुआत भएको बताउनुभयो ।

रासस

Labels: politics