चीनबाट २७ हजार लिटर पेट्रोल नेपाल भित्रियो, आइतबार नौ ट्यांकरले ल्याउने
२०७२ कार्तिक १४ शनिबार
अन्नपुर्ण पोस्ट बाट
रसुवागढी :चीनले उपलब्ध गराएको अनुदानको तेल भरेर तीनवटा ट्यांकर केरुङबाट शनिबार साँझ रसुवागढी नजिकै टिमुरे आइपुगेका छन् । तीन ट्यांकरमा चीनबाट २७ हजार लिटर पेट्रोल नेपाल भित्रिएको छ।
आइतबार ती ट्यांकर काठमाडौं आउनेछन् । रसुवागढीमा रहेका बाँकी नौवटा ट्यांकर तेल भर्न आइतबार बिहान केरुङ जानेछन् ।
शनिबार दिउँसो चारवटा ट्यांकर तेल लिन केरुङ गए पनि हिमपातका कारण उताबाट आउनुपर्ने तेल नआएकोले एउटा ट्यांकर रित्तै फर्किएको हो।
शुक्रबार बेलुका नै रसुवागढी पुगेका १२ ट्यांकरमध्ये साढे एक बजे चारवटा ट्यांकर केरुङतिर लागेका थिए। केरुङ पुग्न कम्तीमा डेढघन्टा लाग्नेछ। ट्यांकरसँगै नेपाल आयल निगमका प्रवक्ता दीपक बरालसहित नेपाली टोली र पेट्रो चाइनका तीन अधिकारी पनि केरुङ गएका थिए।
केरुङभन्दा २० किलोमिटर टाढा भारी हिमपातले गर्दा सिगात्सेबाट तेल बोकेर आएका गाडी केरुङ आउन ढिलाइ भएको हो। हरेक ट्यांकरको क्षमता १२ हजार लिटर भए पनि अप्ठ्यारो बाटो भएकोले नौहजार लिटर लोड गरिने छ। तीनवटा ट्यांकरमा ३६ हजार लिटर पेट्रोल आजै नेपाल प्रवेश गर्नेछ।
चीनतर्फको केरुङ क्षेत्रमा हिमपातले सडक अवरोध भएका कारण चीनको सिगात्सेबाट तेल बोकेर आएका गाडी उतै अड्किएपछि चारवटा ट्यांकर मात्र पठाइएको हो।
बाँकी ट्यांकर आइतबार केरुङ पठाउने तयारी छ।
चीनले अनुदानमा नेपाललाई उपलब्ध गराएको पेट्रोल लिन शुक्रवार दर्जन ट्यांकरसहित नेपाली सरकारी टोली रसुवा पुगेको थियो। चीनले अनुदानमा १० हजार मेट्रिक टन तेल उपलब्ध गराएको छ।
डेढ महिनादेखि नाकाबन्दी लगाएर भारतले इन्धन आपूर्ति रोकेको छ। इन्धन आपूर्ति सहज गराउन पटकपटक पहल तथा पत्राचार गर्दा पनि प्रगति केही नभएपछि सरकारले चीनबाट इन्धन आपूर्ति गर्न सम्झौतासमेत गरिसकेको छ।
0 comments
Write Down Your Responses