१० जिल्लामा पूर्व राजपरिवारको सम्पत्तिमाथि छानबिन

POSTED ON : OCTOBER 28, 2015, IN : NEWS

कुविक एनपी न्युजबाट 

   काठमाडौँ: नेपाल ट्रष्टको कार्यालयले तराईका १० जिल्लामा पूर्व राजपरिवारको नामको सम्पत्ति खोज्न कर्मचारीको समूह पठाउने भएको छ । पूर्वराजा वीरेन्द्र, पूर्व रानी ऐश्वर्य र उनीहरुको परिवारको देहावसान हुँदाका बखतको सम्पत्ति खोज्न कर्मचारीको समूह खटाउने तयारी सुरु गरिएको कार्यालयका कार्यकारी सचिव भीमप्रसाद उपाध्यायले जानकारी दिए ।

 उनलेभ ने – “झापा, मोरङ, सुनसरी, बारा, रुपन्देही, नवलपरासी, बाँके, बर्दिया, कैलाली र कञ्चनपुरमा चालु आवमा जग्गा खोजबिनका लागि समूह पठाउन लागिएको छ । दश जिल्लाका मालपोत कार्यालय र नापी कार्यालयमा गई सूक्ष्मरुपमा अध्ययन गर्न समूह पठाउन लागिएको हो ।” कार्यालयले दुई वर्षअघिदेखि सघन सम्पत्ति खोजबिन अभियान सुरु गरेको थियो ।

 अहिलेसम्म २२ हजार रोपनी जग्गा पूर्व राजपरिवारको नामबाट नेपाल ट्रष्टको कार्यालयको नाममा ल्याइएको प्रवक्ता पर्शुराम अर्यालले जानकारी दिए। “नागार्जुन जङ्गलको २७ हजार रोपनी जग्गा कार्यालयको नाममा ल्याउन सञ्चालक समितिको बैठकबाट निर्णय गरी मन्त्रिपरिषद्मा प्रस्ताव पठाइएको छ, नागार्जुन जङ्गलकै धादिङतर्फको १५ हजार रोपनी जग्गा यसअघि नै ट्रष्टको नाममा आइसकेको छ” – उनले भने ।

 पूर्व राजपरिवारको नामबाट ट्रष्टको नाममा आएका घर जग्गाको भाडाबाट उठेको करिब ३६ करोड ट्रष्टको कोषमा जम्मा भएको छ । यसरी जम्मा भएको रकम नेपाल ट्रष्ट ऐन २०६४ अनुसार सार्वजनिक हितका लागि शिक्षा र स्वास्थ्यमा लगानी गर्न सकिने व्यवस्था रहेको छ ।

सङ्कलित रकम हालसम्म खर्च नभएकाले कार्यविधिको मस्यौदा भइरहेको कार्यालयले जनाएको छ । कार्यविधि बनेपछि तोकिएका जनहितका काममा कोषको उपयोग गरिनेछ ।

Labels: News